ដំបូន្នានថែរក្សាសុខភាពនារដូវក្តៅ

 រដូវក្តៅចូលមកដល់ មនុស្សមួយ ចំនួនពិតជា មានការពិបាកក្នុងការស់នៅ និងមានផល ប៉ះពាល់ខ្លះៗដល់សុខភាព ដូចជា សន្លប់ ថប់ដង្ហើម និងអស់កំលាំង ជាដើម។​បញ្ហានេះ គឺអាចកើតមាន ជាទូទៅចំពោះមនុស្ស គ្រប់វ័យ។

ចំពោះបញ្ហាសន្លប់វិញគឺអាចប៉ះពាល់ខ្លាំងចំពោះសុខភាព ហើយបើមិនបានយកចិត្ត ទុកដាក់ទេ អាចបណ្តាលអោយប៉ះពាល់ដល់ជីវិត នៅពេលសីតុណ្ហភាពឡើងកំដៅខ្លាំង។​ សីតុណ្ហភាព ត្រឹមតែ ៤០អង្សា គឺអាចធ្វើអោយរាងកាយប្រើថាមពល និងអស់ជាតិទឹកច្រើនដោយសារកត្តា បរិស្ថាននៅជុំវិញ។ 

មនុស្សគ្រប់គ្នាអាចនឹងសន្លប់ក្នុងស្ថានភាពក្តៅបែបនេះ សូម្បីតែកុមារតូច មនុស្សចាស់ អ្នកលេង កីឡា និងអ្នកបំពេញការងារនៅទីខាងក្រៅ ជាពិសេសចំពោះមនុស្សដែល មានបញ្ហាសុខភាព បេះដូង សួត គឺអាចប្រឈមមុខនឹងជីវិតខ្លាំងជាងគេ។ រោគសញ្ញាសុខភាពដែល អាចកើតមាន ដោយសារកំដៅឡើងខ្លាំងមានដូចជា៖

• ឈឺក្បាល អស់កម្លាំង ខ្សោយ និងរកកលចង់ក្អួត
• ឈឺសន្លាក់សាច់ដុំ កំដៅខ្លួនកើនឡើង
• របកស្បែក
• ដកដង្ហើមញាប់
• បែកញើសច្រើន
• ដួលសន្លប់

ប្រសិនបើអ្នកមានបញ្ហាទាំងនេះ អ្នកគួរទៅជ្រកក្រោមម្លប់ និងស្វែងរកជំនួយផ្នែកសុខភាពជា បន្ទាន់។ 
 

បញ្ហានេះអាចការពារជាមុនបាន គឺអ្នកត្រូវ៖

• ពិសាទឹកអោយបានច្រើន
• ស្លៀកសំលៀកបំពាក់ស្រាល និងមិនហប់ពេក
• មិនត្រូវធ្វើការអាត់ប្រាណខ្លាំងក្លាពេកនារដូវក្តៅបែបនេះ
• ប្រើក្រែមការពារកំដៅថ្ងៃ អោយបាន ១៥នាទីមុនពេលចេញទៅក្រៅផ្ទះ និងជៀសវាងត្រូវកំដៅថ្ងៃអោយបានច្រើន តាមតែអាចធ្វើទៅបាន។
• មិនត្រូវទុកកុមារនៅក្នុងរថយន្ត ពេលចតរថយន្ត។