គុណប្រយោជន៍ប្រេងសណ្តែកដីចំពោះសុខភាពនិងសម្រស់

បច្ចុប្បន្ននេះ ប្រេងសណ្តែកដីត្រូវបានគេនិយមយកមកប្រើប្រាស់ក្នុងផ្ទះបាយជាញឹកញាប់ ក្នុងការចំអិនអាហារផ្សេងៗដូជា ចៀន ប្រឡាក់  រឺដាក់លាយបន្តិចទៅក្នុងអាហារដើម្បីបន្ថែមរសជាតិ។ គេច្រើនប្រទះឃើញមានប្រើច្រើនក្នុងបណ្តាប្រទេសមួយចំនួនក្នុងតំបន់អាស៊ី ដូចជា ចិន ឡាវ វៀតណាម និងកម្ពុជា។

ប្រេងសណ្តែកដីដែលចម្រាញ់រួចមិនមានក្លិនអ្វីខុសពីប្រេងទូទៅនោះទេ និងអាចប្រើដូច ទៅនឹងប្រេងទូទៅ។ ប៉ុន្តែចូរអ្នកចាំថាក្នុងប្រេងសណ្តែកដីមានសារធាតុអូមេហ្គា ៦ខ្ពស់បំផុត ដូច្នេះអ្នកត្រូវប្រើក្នុងបរិមាណតិច តួចល្មមបានហើយ។  

ប្រេងសណ្តែកដីមិនត្រឹមតែមានគុណប្រយោជន៍ក្នុងការថែសម្រស់ប៉ុណ្ណោះទេ តែថែមទាំងជួយដល់សុខភាពបានផងដែរដូចជា៖

• ប្រើជាប្រេងលាបម៉ាស្សា ៖ បំបាត់បញ្ហាឈឺសន្លាក់ និងសាច់ដុំ និងជួយបង្កើនថាមពលរាងកាយ។
• បំបាត់មុនលើមុខ៖ ដោយយកប្រេងចំនួន ២ទៅ ៣តំណក់ទៅលាយជាមួយទឹកក្រូចឆ្មាបន្តិច រួចយកទៅលាបលើមុខ។ វាក៏អាចជួយការពារមិនអោយកើតមានមុនក្បាលខ្មៅផងដែរ។
• ព្យាបាលបញ្ហាអង្គែ ៖ដោយគ្រាន់តែលាយប្រេងសណ្តែកដីមួយស្លាបព្រាបាយ ជាមួយទឹកក្រូចឆ្មា បន្តិច យកទៅកក់សក់។ វាមិនត្រឹមតែជួយរក្សាលំនឹងប្រូតេអីុនប៉ុណ្ណោះទេ តែថែមទាំងជួយធ្វើ អោយសក់ក្រាស់ មានសំណើម និងការពារភាពបែកចុង។
• ធ្វើអោយបបូរមាត់មានសំណើម៖ មុននឹងលាប អ្នកត្រូវជូតបបូរមាត់អោយស្អាតដោយប្រើច្រាស ដូសធ្មេញជាមុន រួចយកសំឡីជ្រលក់ទឹកក្តៅឧណ្ហៗទៅជូត សឹមយកប្រេងសណ្តែកមកលាប។
• បន្ថយកម្រិតកូឡេស្ទេរ៉ូល៖ ប្រេងសណ្តែកគឺខុសពីប្រេងបន្លែដទៃ ព្រោះវាមិនមានជាតិកូឡេស្ទេ រ៉ូល និងអាចជួយមិនអោយកើតបញ្ហាស្ទះសរសៃឈាម និងជួយកាត់បន្ថយកម្រិតកូឡេស្ទេរ៉ូល បានពី ១០ទៅ ១៥% ជាងប្រេងទូទៅ។
• ជួយសុខភាពបេះដូង៖ សំអាតកាកសំណល់ដែលកកក្នុងសរសៃឈាម និងបន្ថយលទ្ធភាពនៃការឈានទៅកើតជំងឺដាច់សរសៃឈាម និង ជំងឺបេះដូងផ្សេងៗ។
• ការពារជំងឺមហារីក៖ ក្នុងប្រេងសណ្តែកមានកម្រិតសារធាតុអុកស៊ីតកម្ម ប៉ូលីហ្វេណុល (polyphenol) ខ្ពស់និងកម្ចាត់សារធាតុរ៉ាឌីកាល់សេរី ដែលជាសារធាតុគ្រោះថ្នាក់ប៉ះពាល់ដល់ កោសិកា បញ្ហារំលាយអាហារ និងបង្ករជំងឺផ្សេងៗ។
• បន្ថយសំពាធឈាម៖ ប្រេងសណ្តែកដីជួយរក្សាលំនឹងអ័រម៉ូនក្នុងរាងកាយ និងរក្សាចលនាឈាម រត់បានប្រក្រតី ព្រោះសារធាតុ រេសវើរ៉ាត្រុល (resveratrol) ជួយកាត់បន្ថយសំពាធឈាម និង អ័រម៉ូនស្ត្រេះក្នុងប្រព័ន្ធបេះដូង។
• បង្កើនការចងចាំ៖ ជំងឺបាត់ការចងចាំ អាល់ហ្សៃម៉ើ (Alzheimer) គឺជាជំងឺមួយតែងកើតមាន ទៅលើមនុស្សវ័យចំណាស់ ។ ដូច្នេះការពិសាប្រេងសណ្តេក ជាប្រចាំ បានបង្ហាញអោយឃើញថា អាចជួយកាត់បន្ថយភាពខុសប្រក្រតីនៃការចងចាំ និងបញ្ហាភ្លេចភ្លាំងបាន។
• បង្កើនប្រព័ន្ធការពាររាងកាយ៖ សារធាតុ រ៉េសវើរ៉ាត្រុល  ក៏ជាសារធាតុមួយជួយកម្ចាត់ពពួកជំងឺ ឆ្លងប្រភេទវីរុស្សទូទៅ ពពួកផ្សិត និងជម្រុញការផលិតកោសិកាឈាមសជួយការពាររាងកាយ ប្រឆាំងនិងមេរោគផ្សេងៗក្នុងរាងកាយ។ 

បើទោះជាប្រេងសណ្តែកដីមានគុណសម្បត្តិច្រើនទាំងថែរក្សាសម្រស់ និងសុខភាពច្រើនយ៉ាងណាក្តី ចំពោះអ្នកដែលមានបញ្ហាអាល់ឡែកហ្សីុ និងសណ្តែកដី មិនគួរនិងប្រើប្រេងប្រភេទនេះទេ ព្រោះវា ក៏មានលទ្ធភាពធ្វើអោយអ្នកកើតអាការៈអាល់ឡែកហ្សីុដូចគ្នាទៅនឹងសណ្តែកដី ។ ហើយចំពោះមនុស្ស ធាតុក៏មិនគួរពិសាប្រេងនេះច្រើនពេកនោះដែរ ព្រោះវាអាចបណ្តាលអោយឡើងទំងន់ថែមទៀត។ អ្នកគួរប្រើប្រេងសណ្តែកដីក្នុងបរិមាណតិចតួចសមស្រប ទើបជាការប្រសើរ។​