ទូរស័ព្ទ Vertu ម៉ូឌែល New Signature Touch តម្លៃ ១មឺុនដុល្លា

កំពូលទូរស័ព្ទមានតម្លៃថ្លៃលើលោកគឺម៉ាក Vertu ស៊េរីថ្មីម៉ូឌែល Vertu New Signature Touch ថ្មីមួយគឺមានតម្លៃរហូតដល់ទៅ ១មឺុនដុល្លាអាមេរិច។ តើទូរស័ព្ទមួយនេះមានអ្វី ពិសេសទៅ?

គួរបញ្ជាក់ថាក្រុមហ៊ុនផលិតទូរស័ព្ទអង់គ្លេសមួយដែលធ្លាប់ជាផ្នែកមួយនៃក្រុមហ៊ុនធំរបស់ Nokia បានបញ្ជាក់អោយដឹងថា ក្រុមហ៊ុនក៏កំពុងបំពាក់នូវបញ្ចេកវិទ្យាថ្មី ដូចទៅនឹងក្រុមហ៊ុនទូរស័ព្ទ Apple និង Samsung ដែលកំពុងឈានមុខក្នុង ពេលបច្ចុប្បន្ននេះនៅលើទីផ្សារទូរស័ព្ទផងដែរ។

រូបរាងរបស់ទូរស័ព្ទនេះ ត្រូវបានផលិតស្រោបពីលោហះទីតានីញ៉ូមសុទ្ធ អេក្រង់ទំហំ ៥,២អីុង កម្រិតរីសូលុយហ្សិន 428ppi និងបំពាក់អេក្រង់ប្រភេទត្បូងកណ្តៀង (Sapphire glass) ដែលសមាសធាតុទាំងនេះមានតម្លៃថ្លៃ បំផុតនៅលើទីផ្សារ។ ហើយពីមុនមកមិនទាន់មានក្រុមហ៊ុនណាមួយបានប្រើវត្ថុធាតុដើមនេះនៅឡើយទេ គឺគ្រាន់តែគិតចង់យកមកធ្វើជាកញ្ចក់ Len កាម៉េរ៉ាប៉ុណ្ណោះ។

ក្រៅពីនេះវាបានបំពាក់មកជាមួយនូវល្បឿនប្រភេទ Octa-core, Snapdragon 810, 64bit ដំណើរការដោយប្រព័ន្ធ អេនឌ្រ័យ Lollipop 5.1 ។ កាម៉េរ៉ាក្រោយទំហំ ២១មេហ្គាភិចសែល អាចថតវីដេអូបានទំហំកម្រិត 4K។ ចំពោះអង្គគណនាមានទំហំ 4GB និងទំហំផ្ទុកឯកសារ 64GBនៅលើម៉ាស៊ីន និងអាចបន្ថែមមេម៉ូរីប្រភេទ microSD បានទៅដល់ ២០០០ជីហ្គាបៃ (2TB)។